Cando España se incorporou á Unión Europea en 1986 a renda media por habitante de Galicia roldaba o 50% da media comunitaria. Os galegos vivían entón unha situación similar á que experimentan hoxe os habitantes das rexións máis pobres de países como Romanía e Bulgaria, pero en pouco máis de dous decenios achegáronse ata o bordo dos niveis comunitarios de riqueza de socios como Francia e Italia.A Fundación das Caixas de Aforro (Funcas) presentou un informe que sitúa a Galicia no 90,1% da renda media dos quince países máis ricos de Europa. Unha boa noticia, pero que esconde unha proposición enganosa. En primeiro lugar, porque a metodoloxía de Funcas difire da que emprega a Comisión Europea, cuxas cifras son máis contidas e agrandan en varios puntos a brecha entre Galicia e a UE. E en segundo termo, porque os seus datos reflicten unha grave contradición: no período analizado (2000-2008), Galicia creceu a un ritmo anual do 2,65%, o terceiro máis baixo de España. E a pesar diso, segundo Funcas, a comunidade achegouse a Europa a maior velocidade que o resto.
Isto ten unha sinxela explicación, e serve ademais para alertar sobre unha das debilidades endémicas da economía galega, que leva ameazando a súa converxencia dende moito antes de que estalase a crise. Entre o 2000 e o 2008 a poboación española aumentou un 12,6%, pero en Galicia o crecemento demográfico non superou o 1,13%. Non é que haxa moita máis riqueza, senón que non hai moitos menos galegos entre os que repartila.¿Lembras como se calcula a renda per cápita, dividindo a Renda Nacional entre o nº de habitantes?. A crise demográfica empuxa a Galicia a converxer coa UE, a riqueza aumentou un 2,65% anual entre o 2000 e o 2008, pero o censo só creceu un 1,13% nese período e a renda per cápita achégase á media comunitaria grazas a que a economía crece moito máis que a poboación
É certo que Galicia pode compararse hoxe con algúns dos seus veciños europeos. Pero os galegos non deberían acomodarse nesa posición. O seu soño de converxencia aínda se asenta sobre bases demasiado fráxiles.
Fonte: A Voz de Galicia
